Ӗнер, пуш уйӑхӗн 22-мӗшӗнче, Чӑваш Ен строительство, архитектура тата ҫурт-йӗрпе коммуналлӑ хуҫалӑх министрне Александр Героева ӗҫрен кӑларнӑ.

Республика Элтеперӗн хушӑвӗнче палӑртнӑ тӑрӑх, министр пулнӑ Александр Валерьевич ӗҫрен кайма хӑй кӑмӑл тунӑ. Ҫавна май ӑна РФ Ӗҫ кодексӗн 77-мӗш статйин 3-мӗш пайӗпе килӗшӳллӗн ӗҫрен хӑтарнӑ.

Александр Героев 1977 ҫулхи ака уйӑхӗн 6-мӗшӗнче Шупашкарта ҫуралнӑ. Строительство отраслӗнче 18 ҫул ытла ӗҫленӗ. Пӗлӗве вӑл И.Н. Ульянов ячӗллӗ Чӑваш патшалӑх университетӗнче илнӗ. Министр тивӗҫне пурнӑҫлама ӑна пӗлтӗрхи нарӑс уйӑхӗн 10-мӗшӗнче шаннӑ, ҫав ҫулхи пуш уйӑхӗн 13-мӗшӗнче министр тилхепине тыттарнӑ.

Пуш уйӑхӗн 20-мӗшӗнче Чӑваш Республикин Нотариус палатин пайташӗсен ҫулталӑкри пухӑвӗ иртнӗ. Унта Чӑваш Республикин Юстици ӗҫӗсен патшалӑх службин ертӳҫи Дмитрий Сержантов хутшӑннӑ.

Ҫав кунах Нотариус палатин президентне суйлас ыйтӑва пӑхса тухнӑ. Ку тивӗҫе пурнӑҫлама Елизавета Соколовӑнах шаннӑ. Елизавета Ильинична ҫак тилхепене 1993 ҫултанпа тытса пырать. Чӑваш Республикин Юстици ӗҫӗсен патшалӑх службинче палӑртнӑ тӑрӑх, ҫав вӑхӑтра Елизавета Соколова нотариата аталантарма пысӑк тӳпе хывнӑ.

Пухура Нотариус палатин правлени тата ревизи комиссийӗн пайташӗсене суйланӑ.

pravdapfo.ru сӑнӳкерчӗкӗ

Чӑваш Ен Правительство ҫуртӗнче кадр улшӑнӑвӗ пулса иртнӗ. Хальхинче промышленность тата энергетика министрӗн ҫумӗ пулма ҫӗнӗ ҫынна ҫирӗплетнӗ. Хушӑва республика ертӳҫи Олег Николаев паян, пуш уйӑхӗн 17-мӗшӗнче, алӑ пуснӑ.

Промышленноҫпа энергетика министрӗн ҫумӗ пулма Александр Кондратьева шаннӑ.

Асӑннӑ пукан кӑҫалхи нарӑс уйӑхӗнче пушаннӑ. Министр ҫумӗ пулса тӑрӑшнӑ Андрей Германов ун чухне ӗҫрен пӑрахнӑ.

Халӗ Евгений Герасимов министрӑн каллех икӗ ҫум: Сергей Лекарев тата паян ҫирӗплетнӗ Александр Кондратьев.

Пуш уйӑхӗн 15-мӗшӗнче ӗҫлев тата социаллӑ хӳтлӗх министрӗн ҫумӗ пулма Алексей Григорьева шаннӑччӗ.

Шупашкар хула администрацийӗн пуҫлӑхӗ Алексей Ладыков паян хӑйӗн пӗр ҫумӗсӗр юлнӑ. Ку хыпара «Ҫыхӑнура» форума пӗлтернӗ.

Владимир Яковлев экономика аталанӑвӗ тата финанс енӗпе хула администрацийӗн пуҫлӑхӗн ҫумӗ пулса тӑрӑшнӑ. Ку должноҫре вӑл икӗ ҫула яхӑн тимленӗ.

Сити-менеджер Владимир Яковлева пӗрле ӗҫленӗшӗн тав тунӑ, ҫӗнӗ ӗҫре ӑнӑҫу суннӑ, анчах ӑҫта каяссине пӗлтермен.

Хула администрацине куҫиччен Владимир Яковлев банк тытӑмӗнче ӗҫленӗ. Вӑл «Связь-Банк» кредит учрежденийӗн республикӑри уйрӑмне ертсе пынӑ.

Ӗнер, пуш уйӑхӗн 15-мӗшӗнче, Чӑваш Ен ӗҫлев тата социаллӑ хӳтлӗх министрӗн ҫумӗ пулма Алексей Григорьева ҫирӗплетнӗ.

Аса илтерер: Чӑваш Ен Ӗҫ тата социаллӑ хӳтлӗх министерствинче кадр улшӑнӑвӗ нарӑс уйӑхӗн 24-мӗшӗнче пулса иртнӗччӗ. Министр ҫумне Алина Кузнецовӑна ӗҫрен кӑларнӑ хыҫҫӑн Алена Елизарова министрӑн ҫумӗсем иккӗн юлнӑччӗ: Лариса Арсентьева (вӑл – пӗрремӗш ҫум) тата Александр Колесников. Халӗ, ав, виҫҫӗмӗшне ӗҫе илнӗ. Тӗрӗсрех, таҫтан ютран мар. Алексей Валериевич асӑннӑ ведомствӑра социаллӑ тӳлевсен пай пуҫлӑхӗнче тӑрӑшнӑ.

Чӑваш Ен премьер-министрӗ тата Коми Республикин Пуҫлӑхӗ пулнӑ 50 ҫулти Сергей Гапликов ҫӗнӗрен йӗркеленӗ Мускаври пӗр предприятие ертсе пырӗ. Асӑннӑ компани «Техсити Девелопмент» ятлӑ. ӑна «Ростех» патшалӑх корпорацийӗпе «Crocus Group» компанин уҫнӑ.

«Техсити Девелопмент» тулли мар яваплӑ мар обществӑна кӑҫалхи пуш уйӑхӗн 9-мӗшӗнче Мускавра регистрациленӗ. Предприятин пурлӑхӗн 51 процентне «Crocus Group» 51 процент хывнӑ, «Ростех» – 49 процент.

Хальтерех йӗркеленӗ предприятин тӗп тивӗҫӗ – инженери ӗҫӗсем, инженерипе техника проекчӗсем хатӗрлесси, ҫак енӗпе сӗнӳ-канашпа пулӑшасси, проектсене епле хатӗрленине тӗрӗслесси.

Чӑваш Енри Тӗп медицинӑпа социаллӑ экспертиза бюровӗн ертӳҫи улшӑннӑ. Кун пирки республикӑн ӗҫлев тата социаллӑ хӳтлӗх министрӗ Алена Елизарова Инстаграмра пӗлтернӗ.

Министр ҫырнӑ тӑрӑх, ҫӗнӗ пуҫлӑхпа ӗнер, пуш уйӑхӗн 2-мӗшӗнче, ӗҫлӗ тӗл пулу ирттернӗ. Медицинӑпа бюро эскпертизин бюровне Карина Митина етсе пырать. Ҫӗнӗ ертӳҫӗпе министр сусӑр ҫынсене социаллӑ пулӑшу парас ыйтусене сӳтсе явнӑ. Ҫав шутра – реабилитаци тата абилитаци енӗпе те.

Чӑваш Ен Ӗҫ тата социаллӑ хӳтлӗх министерствинче кадр улшӑнӑвӗ пулса иртнӗ.

Республикӑн Министрсен Кабинечӗн Ертӳҫи паян, нарӑс уйӑхӗн 24-мӗшӗнче, кӑларнӑ хушура сӑмах Алина Кузнецова пирки пырать. Алина Ноевнӑна министр ҫумӗнчен кӑларма йышӑннӑ.

Алина Кузнецова министр ҫумӗ пулса 2018 ҫулхи юпа уйӑхӗнченпе ӗҫленӗ. Унччен вӑл асӑннӑ ведомствӑра финанс пайӗн пуҫлӑхӗнче ӗҫленӗ. Халӗ Алена Елизарова министрӑн ҫумӗсем иккӗ: Лариса Арсентьева (вӑл – пӗрремӗш ҫум) тата Александр Колесников.

Чӑваш Енӗн Культура, национальноҫсен ӗҫӗсен тата архив ӗҫӗн министерстви оперӑпа балет театрӗнчи икӗ должность валли кадр резервӗ хатӗрлессине пӗлтернӗ.

Министерствӑн сайтӗнче темиҫе кун каялла вырнаҫтарнӑ хыпарта каланӑ тӑрӑх, Чӑваш патшалӑх оперӑпа балет театрӗн директорӗ тата художество ертӳҫи пулма тивӗҫ ҫынсенчен кадр резервӗ йӗркелӗҫ.

Документсене ҫак уйӑхӗн 24-мӗшӗччен парса ӗлкӗрмелле. Вӗсене ӗҫ кунӗсенче йышӑнаҫҫӗ. Вӗсене Шупашкарти Президент бульварӗнчи 17-мӗш ҫутри 411-мӗш пӳлӗме ҫитерсе памалла.

Муркаш районӗнчи Кашмашри агрошкул валли директор шыраҫҫӗ. Унта ҫӗршывра халиччен пулман агрошкул уҫӗҫ.

Вӗренӳ учрежденийӗ ял хуҫалӑх специалисчӗсене пӗчӗкрен туптӗ. Ачасене ветеринари вӑрттӑнлӑхне, кукӑль-ҫӑмах тата сыр пӗҫерессине т.ыт. те пӗчӗкрен хӑнӑхтарӗс. Шкултан вӗренсе тухнисене аграри техникумӗсемпе аслӑ шкулӗсене кӗме ҫӑмӑл пулӗ.

Кашмашри шкул директорӗ пулас ӗмӗтлӗ ҫыннӑн вӗренӳ учрежденине аталантармалли программа та хатӗрлемелле. Конкурса хутшӑнакансене заявленийӗсене пуш уйӑхӗн 15-мӗшеччен йышӑнӗҫ. Шкула, аса илтерер, кӑҫал хута ямалла.